Грција очекува на 15 септември да добие 30 милиони евра од Европската унија наменети за справување со бегалската криза, соопшти заменик-министерот за миграции Јанис Музалас на состанок со синдикатот на општините (КЕДЕ).
Според него, грчката Влада има конкретен план за да се справи со кризата и побара од членовите на КЕДЕ тесно да соработуваат со привремената влада.
– Без локалната самоуправа, кризата не може да се реши. Целта е бројот на бегалците на островите да се направи одржлив, поради што ќе бидат ангажирани повеќе бродови за побрзо да ги префрлат на копно, рече Музалас.
Тој, сепак, додаде дека е потребно да се создадат привремени прифатни центри за да се забрза нивната обработка.
Министерот, исто така, рече дека се очекува приливот на бегалци од Турција уште повеќе да се зголеми во наредните месеци.