Во местото Губашево во близина на градот Забок во Хрватска, синоќа околу 23 часот избувна пожар во зградата на компанијата CIAK, која складира опасни материјали, а неколку противпожарни единици учествуваат во неговото гаснење.
CIAK има хали и фабрика за рециклирање батерии, а локалните медиуми објавуваат дека на местото на настанот се наоѓаат повеќе од 60 пожарникари. Порталот Zagorje.com објавува дека целата зграда гори и дека се слушаат експлозии, како и дека станува збор за компанија која се занимава со отстранување на опасен отпад.
„Најопасните отпадни хемикалии што ги има хрватската хемиска индустрија се складирани тука“, изјавија работниците за новинарите од порталот Zagorje.com.
На местото на настанот пристигна и градоначалничката на Забок, Валентина Ѓурек, која рече дека структурата веќе се срушила одозгора, но дека сè уште не знае никакви детали.
Веднаш по избувнувањето на пожарот, беше алармиран и Институтот за јавно здравје „Д-р Андрија Штампар“, кој треба да го испита квалитетот на воздухот и дали постојат опасности за локалното население.
Како што изјави претседателот на Противпожарната бригада Стјепан Скулибер за Zagorje.com, се препорачува сите жители во радиус од пет километри да ги затворат прозорците.
„Пожарникарите го гаснат пожарот и засега не можеме да прецизираме ништо друго“, изјавија за Хина од Полициската управа.
Хрватските медиуми јавуваат дека во гаснењето учествувале 60 пожарникари од јавната противпожарна станица во Загорје и уште осум противпожарни бригади од околината.
Околу 3.30 часот наутро, бројни жители на Загорје беа разбудени од порака, имено HR112 ALERT, со која се предупредуваа граѓаните за потенцијалната опасност поради пожарот во CIAK во Забок.
На мобилните екрани на бројни граѓани се појави порака на црвена позадина, на англиски и германски јазик, и преку СМС на хрватски јазик.
„Пожар во магацинот на CIAK во Забок, затворете ги прозорците и не се приближувајте до местото на пожарот. Следете ги упатствата на надлежните служби. Повеќе на линкот 112.hr/8NL“, се вели во пораката од Дирекцијата за цивилна заштита на Република Хрватска.