Познат е идентитетот на мажите кои денеска преживеаја вистинска драма во пожар на Врачар (Белград) – станува збор за татко и син, Владимир и Марко Ј., пренесува „Telegraf.rs“.
Драмата, која можеше да прерасне во голема трагедија, се одвиваше околу 12 часот во стан на третиот кат каде избувна силен пожар, кој за само неколку минути го зафати целиот простор од 60 квадратни метри.
Таткото Владимир бил внатре во станот во моментот кога избувнал пожарот и останал заробен во просторија исполнета со густ чад.
Во исто време, неговиот син Марко, бегајќи од високата температура и задушувањето, излегол низ прозорецот и буквално висел од надворешниот праг, држејќи се за самиот раб, додека зад него беснееле пламените јазици.
Набргу, на Врачар одекнаа сирените на шест противпожарни возила.
Дури 19 пожарникари-спасувачи од единиците на Звездара, Вождовац и Земун пристигнаа на локацијата за само пет минути и затекнаа драматична глетка.
Во молскавична и храбра акција, спасувачите успеаја да го симнат Марко од прозорецот и да го извлечат неговиот татко Владимир од станот што гореше.
Двајцата се здобиле со изгореници и вдишале опасни продукти од согорувањето, поради што екипата на Итната помош веднаш ги пренела на понатамошно лекување и нега.