-Во Словенија треба да се рехабилитираат зборовите чесност и чест, особено во политиката која стана обична маскарада и каде што зборот чест не постои, рече поранешниот словенечки премиер, Јанез Јанша во својот говор, во кој им се заблагодари на своите симпатизери, кои го испратија до затвор и додаде дека во таму има повеќе чесни луѓе отколку во политиката, пренесуваат агенциите.
Тој вчера учестуваше во телевизиско предизборно соочување со претседателите на словенечките политички партии, при што покрај политичарите ги осуди и медиумите за наводно пристрасно известување за неговиот случај и судење, на кое доби две години казна затвор, поради корупциската афера „Патрија“.
Според пресудата, Јанша во 2006 година, додека беше премиер од посредници на „Патрија“ прифатил ветување дека ќе добие парична награда, доколку таа фирма го добие тендерот за снабдување на словенечката армија со оклопни возила, вреден 278 милиони евра.
Оваа пресуда може да ја укине единствено Врховниот суд, до кој Јанша поднесе жалба, но одлуката од оваа институција се уште не е донесена. 
Е. Г.