На денешната десетта рунда од разговорите меѓу делегациите на Белград и на Приштина во Брисел, Србија и Косово постигнаа договор, објави посредникот во дијалогот Кетрин Ештон.
Таа им честиташе на двете делегации предводени од премиерите Ивица Дачиќ и Хашим Тачи за покажаната храброст.
„Прифатени се сите српски предлози“, рече првиот потпретседател на владата на Србија Александар Вучиќ.
Заедницата на српски општини на Косово ќе има претседател, потпретседател и Совет, како и право да избира регионален командир на полицијата, и четири командири во четирите општини на северот и на југот на Косово, секаде каде што Србите се мнозинство, a војската на Косово нема да смее да влегува во српскиот дел.
Претседателот на Владата на Србија истакна дека ова е најдобриот предлог досега за Белград, и дека точката девет која се однесува на прашањето за полицијата и изборот на регионален командир останала, а од точката 14 е исфрлена реченицата дека Србија не смее да го блокира Косово во меѓународните организации, туку во процесот на евроинтеграции.
Дачиќ потенцираше дека не го потпишал договорот, туку само го парафирал, а за предлог текстот ќе се одлучува во следните деневи во Белград и во Приштина.
-Белград во понеделник писмено ќе ја извести високата претстваничка на ЕУ, Кетрин Ештон дали го прифаќа договорот или не, рече Дачиќ.
Ештон им честиташе на двајцата премири, Дачиќ и Тачи и кажа дека парафирањето на текстот е важен чекор кон Европа.
-Сакам да им честитам на двете страни за покажаната храброст, напиша Ештон.
Делегацијата на Србија во седиштето на НАТО ќе разговара за гаранциите за неприсуство на косовската војска на северот и за гаранциите за безбедност на Србите на Косово.