Словенија спроведува надворешна политика во согласност со националните интереси на земјата, изјави словенечкиот министер за надворешни работи Карл Ерјавец по разговорите во Љубљана со својот руски колега Сергеј Лавров.
– Ние не спроведуваме проамериканска или проруска политика, туку само онаа што им служи на словенечките интереси, истакна Ерјавец, но дополни дека Словенија треба да ги исполнува своите обврски како членка на ЕУ и НАТО.
Лавров, од своја страна, истакна дека Русија високо ја цени позицијата на Словенија во односите на Москва со ЕУ и со НАТО.
– При разгледување на меѓународните прашања, високо го оценивме ставот на Словенија за односите меѓу Руската Федерација и ЕУ и меѓу Русија и НАТО, што значи дека членството во овие структури не подразбира дека треба да се прекинат односите со сите други членки на меѓународната заедница, колку и тоа некој да го посакува, изјави Лавров.
Тој истакна дека Русија, како и Словенија, е подготвена да комуницира со која било друга влада што е отворена за рамноправна, взаемно корисна, избалансирана соработка.
– Мислам дека е апсолутно погрешно и штетно некои земји да се соочат со лажен избор – или сте со Запад или со Исток, вели Лавров.
– За жал, некои наши западни колеги имаат таква логика во односите со земјите од Западен Балкан, а и не само таму, рече рускиот министер за надворешни работи.