Албанскиот премиер Еди Рама реагираше на синоќешниот инцидент на фудбалскиот натпревар меѓу Албанија и Србија во Белград, објавувајќи на Твитер дека соседите оставиле лош впечаток за организацијата.
– Горди бевме со црвено-црните додека се играше фудбалот, но за жал соседите оставија лош впечаток за организацијата, напиша Рама на својот налог на Твитер.
Фудбалскиот натпревар меѓу репрезентациите на Србија и Албанија, што се одигра за квалификации за учество за Европското првенство 2016. беше прекинат синоќа во 42-та минута по инцидентот со албанското знаме.
Братот на албанскиот премиер, Орфи Рама беше уапсен синоќа во ВИП ложата на стадионот „Партизан“, под сомнение дека го организирал и раководел со инцидентот со албанското знаме, по што натпреварот беше прекинат. Подоцна тој беше ослободен и вратен во Албанија.