Српскиот министер за финансии и економија и лидер на партијата Обединети региони на Србија, Млаѓан Динкиќ денеска изјави дека Белград би требало да го прифати предложеното решение за Косово, бидејќи Србија нема шанса како изолирана земја.
– Ќе имаме единствен став и сметам дека ќе се оди во тој правец. Треба да се затвори дел од историјата и да се свртиме кон иднината, без да се заборават Србите кои живеат во Косово. Историјата не научи дека колку повеќе се чека, толку решенијата стануваат полоши, истакна Динкиќ.
Тој, како што пренесе „Блиц“, смета дека треба да се оди кон ЕУ и да се прифати решение со кое ќе се започнат трајни и стабилни односи со Приштина, но дека не треба да се заборават косовските Срби.
– Ако не биде постигнат договор, последиците ќе бидат штетни и ќе паднеме во индиректна изолација, за што Србија не треба ни да помислува. Никој од нас не сака да се откажуваме од помошта за косовските Срби, доколку Србија е економски слаба, тогаш таа не може да им помогне, додаде српскиот министер.