Вицепремиерот на Србија, Александар Вучиќ разговарал со двајца авторитетни политичари и експерти Стивен Баерс и Питер Лили за можноста да бидат негови советници за економија, објави „Данас“.
Конечен договор не е постигнат и консултациите ќе продолжат, наведува весникот. Баерс и Лили се членови на различни партии. Баерс е лабурист и беше член на кабинетот на Тони Блер, а конзервативецот Лили беше член на владата на Тачер и Мејџор, а сега е пратеник во британскиот парламент.
Се смета дека меѓу причините за интерес на Вучиќ за потенцијални соработници од Велика Британија е и тоа што британскиот амбасадор во Белград Мајкл Давенпорт во септември станува шеф на делегацијата на ЕУ во Србија и силната „британска врска“ би можела да биде многу корисна за српската Влада, додава весникот.
„Данас“ укажува дека Вучиќ во изминатите неколку недели води интензивни разговори со експерти за финансии и економија од повеќе европски држави за да се ангажираат во советничкиот тим во реконструираната влада на Србија. Медиумски најатрактивно име е Доминик Строс Кан, поранешен шеф на ММФ, кој би можел да биде главен економски советник на Вучиќ.