Словенечката премиерка Аленка Братушек би требало денеска на претседателот Борут Пахор и на претседателот на Парламентот Јанко Вебер, да им ја врачи својата оставка на функцијата, откако загуби на партиските избори за лидер на Позитивна Словенија од градоначалникот на Љубљана и основач на партијата, Зоран Јанковиќ.
По состанокот со коалициските партнери на Брдо кај Крањ во саботата, Братушек соопшти дека заеднички заклучок е дека најдобро за Словенија би било таа да поднесе оставка и што побрзо, уште пред летото, да се одржат предвремени избори.
Братушек истакна дека политичката ситуација не е причина „за паника“, бидејќи нејзината Влада ги стабилизирала јавните финансии, а и оценката на економските прогнози до крајот на годината е подобра од претходните.
Словенечката опозиција, меѓутоа, ја критикуваше одлуката на Братушек и смета дека оставка требала да поднесе веднаш откако ги загубила изборите во партијата.