Во францускиот град Ним, со рекордна стапка на невработеност, отворена е пекара каде исклучиво се продава пециво од претходниот ден.
Пецивото во новоотворената пекара е двојно поевтино и според зборовите на вработените многу добро се продава.
Францускиот багет чини 40 центи наместо 80 и 90, а продавачката вели дека ако го попрскате со вода и го загреете во рерна, ќе стане повторно свеж.
Во пекарата можат да се најдат и останати видови пециво кои не се толку подложни на „сушење“, како што се кроасаните, кои посебно добро се продаваат, како и пици и колачи.
Пекарата се снабдува со производите кои останале од претходниот ден од локалот на истиот сопственик.
Големата посетеност на пекарата која продава стар леб и која е прва од овој вид во Франција, како што коментира францускиот весник „Паризиен“, не треба да биде чудна, бидејќи станува збор за град на југот на Франција во кој стапката на невработеност има рекордни 13,4 отсто.