Потпретседателката на српската влада и министерка за рударство и енергетика, Зорана Михајловиќ, гостуваше во емисијата Ами Џи Шоу, каде сподели детали од приватниот живот, вклучувајќи и совети од лично искуство како гледачите како да го „стопат“ вишокот килограми.
Една од најблиските соработнички на српскиот претседател Александар Вучиќ кажа дека успешно ја „истенчила“ линијата, а сподели и снимка од нејзината пилатес-рутина која ѝ помогнала да ја оствари целта.
„Вежбам секој ден по работното време, освен за време на викендот, кој сепак е за уживање,“ рече Михајловиќ, која според дел од српските медиуми, симнала 23 килограми.
50-годишната политичарка, која беше и министерка за транспорт и инфраструктура во претходниот состав на српската влада, откри и дека оди на електростимулација на мускулите, што е популарен третман во Србија. Михајловиќ сподели со гледачите и дека наутро, откако ќе ги нахрани мачорот по име Момчило и двете кучиња, пие сок од јаболко, цвекло и морков додека чита и пишува мејлови.
Министерката вели дека се буди околу 4:30 часот, а дека навечер легнува порано, па се пошегува дека во времето кога се емитува емисијата во која гостуваше, таа веќе спие.