Популарното шоу „Танц со ѕвездите“ од крајот на февруари во викенд-термин ќе се прикажува и на Македонската телевизија, која ќе биде меѓу 40-ина телевизии што доби лиценца од Би-Би-Си. Адаптираното шоу таа ќе го организира во соработка со продукцијата „Дрим фактори“.
Ќе учествуваат десет двојки – професионални танчари во тандем со познати личности од различни категории – пејачи, ТВ-водители, актери, спортисти. Тие ќе се натпреваруваат во стандардни и латино танци. Во секоја емисија ќе излегува по еден пар, а тој што ќе остане до крајот е победник и ќе ја затвори првата сезона на крајот на мај.
На прес-конференција денеска беа соопштени ѕвездите кои ќе вежбаат кореографии и ќе танцуваат со професионалните танчари-партнери: ТВ-водителите Бранко Чуповски и Маријана Станојковска, пејачите Викторија Лоба, Аделина Тахири и Александар Белов, актерите Васил Зафирчев, Висар Вишка и Јелена Јованова и спортистите Александар Николовски и Адријана Будимир. Водител на шоуто ќе биде актерот Тони Михајловски, а водителката се уште не е избрана.
– Тоа ќе биде најголемо шоу досега прикажано во Македонија. Како јавен сервис успеавме да го добиеме и ветуваме дека ќе биде најдобро организиран и најгледан ТВ-проект во земјава, рече генералниот директор на МРТ Марјан Цветковски.
За шоуто се прави и ново студио од 800 метри квадратни, со подиум за танцување од 150 метри квадратни. Ќе има и различни костими за секој натпреварувач, сценографија, светло… Ќе има и публика, покрај жирито кое ќе одлучува за победниците. Организаторите денеска не ги соопштија членовите на жирито, а во тајност засега е и наградата што ќе ја добие најдобрата двојка на крајот на сезоната.
Оригиналното шоу на Би-Би-Си досега имало 15 сезони и е доста гледано и посетено, така што новогодишните шоуа од проектот се организираат на стадионот Вембли. Втората сезона на „Танц со ѕвездите“ во Македонија ќе почне во септември со нови познати лица.