Најголемата социјална мрежа на светот, Фејсбук, започнува со менување на своите алгоритми, за тие да можат да препознаваат сомнителни содржини и да ги рангираат пониско од останатите објави.
По претседателските избори во САД, низ светот започнаа дебати околу тоа колкаво влијание врз јавното мислење имаат лажните вести кои најчесто се споделуваат на Фејсбук.
Германската влада се плаши дека со лажни вести ќе може да се влијае на парламентарните избори во Германија, па вршат притисок врз Марк Цукенберг да го реши тој проблем.
Во изминатите неколку месеци Фејсбук ја ограничи можноста за спонзорирано ширење на сомнителни објави и воведоа можност за пријавување на лажни вести, со што тие содржини потоа ги проверуваат аналитичари.
Сега на ред дојде и алгоритмот за почетната страна на Фејсбук, кој автоматски повеќе ќе ги промовира легитимните и виралните содржини.
Не само што ќе се труди да ги намали лажните вести, туку и ќе ја намали видливоста и на статии со сензационалистички наслови (clickbait) и статии кои ги присилуваат луѓето да лајкнат, споделат или да се претплатат на сајот.
Со промените Фејсбук ќе се обиде и да се создаваат повеќе вирални содржини. Објавите на страници или поединци кои ќе привлечат многу внимание на Фејсбук ќе добиваат подобра позиција на почетната страница.