Измамник од Скопје, кој е на издржување затворска казна во затворот Идризово, преку мобилен телефон на повеќе управители на фирми им се претставувал како и самиот да е газда, успевајќи да ги натера да му префрлаат пари, соопшти полицијата.
„СВР Тетово поднесе кривична пријава против Б.А.(34) од Скопје, поради постоење основи на сомнение за сторени седум кривични дела „измама“. Во периодот од 02.07.2019 до 13.02.2020, додека бил на издржување казна затвор во Казнено-поправната установа Затвор „Идризово“ – Скопје, преку мобилен телефон лажно се претставувал како сопственик или раководител на различни фирми и лицата К.Б.(65), С.К.(47), Џ.Л.(55) од Тетово, А.Х.(36), Ј.М.(67) од Скопје, С.С.(40) од с.Џепчиште и М.Б.(62) од с.Беловиште ги довел во заблуда дека неговата фирма деловно ќе соработува со нив и од нив успеал да земе парични средства,“ се вели во полициското соопштение.
Со измамата скопјанецот успеал да извлече околу 5.000 евра од сопствениците на фирми, велат од МВР.