На денешното рочиште за судењето за предметот „Насилство” на СЈО, сведочи Цветанка Симоновска, поранешна советничка на коалицијата предводена од СДСМ во Општина Центар.
Таа се присетуваше на 7 и 10 јуни, деновите кога имаше немири во и пред општина Центар.
„Секогаш кога Шиповиќ ќе отвореше уста, ѕвонеа телефоните на Даниела Рангелова и Томислав Лазаревски”, рече екссоветничката Симоновска.
„Не знаевме дека пеколот доаѓа за 3 дена во понеделник” рече таа пред судот.
„Атакот тој ден во петокот беше врз нас, а не врз советниците на ВМРО-ДПМНЕ“, се присетуваше Симоновска, која додаде дека целта била да се оневозможи советот да работи.
„Тогаш имавме тесно мнозинство од 12:11 за донесување на одлуките“, рече таа.
Група луѓе, како што рече таа, влегла со викање на влезот на бараката бр. 6 каде заседавал советот.
Утре се навршуваат 5 години од тој настан и може да прославиме мал јубилеј, се пошегува ексоветничката, на што се насмеаја обвинетите.
„Полицајците само фигурираа пред општината и не повикаа засилување“, нагласи таа.
Ова се случувало од 13 до 19 часот кога седницата била прекината и презакажана за понеделник, кога требало да се расправа за спорните ДУП-ови на општината.
Во судницата се наоѓаат 11 обвинети. Двајца признаа вина и добија условни казни, а за еден се води издвоена постапка.
Обвинети со случајот се експремиерот Никола Груевски, поранешниот министер за транспорт и врски, Миле Јанакиески, пратеничката на ВМРО-ДПМНЕ, Даниела Рангелова и уште девет лица.
Васко Маглешов