Видно ме вознемири веста дека гори Универзална сала. Дојдов да видам што се случува, бев директор од 2005 до 2009 година, време во кое што и тогаш беше преамортизиран објектот, дури беше на граница на употреблива вредност. Ваков објект од времен карактер не смееше да работи во такво светло повеќе од 40-50 години, рече поранешниот директор на Универзалната сала, Душко Поповски.
„Откако станав директор, прва информација која што ја добив беше дека ист ваков објект во Бугарија изгорел за седум минути. Мој најголем страв беше дека еден ден ќе се случи пожар и навистина се случи, за среќа без човечки жртви и без повредени, навивам да е така. Беше синоним за сите луѓе во Македонија, за Универзална сала сите знаеме затоа што во времето на работа поминати се повеќе од 6 милиони жители. Жалосно е што не се направи пред 30 години, објектот беше измалтретиран. Уште во 2005 година имаше проект за реконструкција и доградба, но тој објект се менуваше, не знам за какви интереси. Тој проект што го започнав во тоа време не се реализира и сето тоа така тлееше и одеше, се додека се запали, среќно е што не се урна“, кажа Поповски.