Двајца пожарникари, на возраст од 23 и 44 години, загинаа денес, а трет беше повреден кога се урна дел од напуштен објект додека гаснеле пожар во Зефири, во општината Фили, во близина на Атина.
Според грчкиот информативен портал „Прототема“, пожарот избувнал околу 11:40 часот во зграда на улицата „Кацантони“.
На местото на настанот биле испратени дваесет пожарникари со шест возила; за време на интервенцијата, дел од објектот се урнал врз пожарникарите кои се наоѓале внатре.
Двајца пожарникари биле извлечени во бесвесна состојба и пренесени во болница, каде што им подлегнале на повредите, додека трет повреден пожарникар исто така е хоспитализиран.
Надлежните истражуваат дали пожарникарите починале од вдишување чад или од повредите здобиени при уривањето на објектот.
Причината за пожарот и точните околности на несреќата сè уште се утврдуваат.
Противпожарната служба најави спроведување административна истрага, а знамињата пред нејзините објекти се спуштени на половина копје во знак на жалост за двајцата загинати пожарникари.