Со низа активности под мотото „150 години хуманитарна акција“ Црвениот крст на град Скопје ќе го одбележи 8 Мај, Светскиот ден на Црвениот крст и Црвената полумесечина.
Во рамките на одбележувањето ќе бидат доделени благодарници на крводарители со над 100 крводарување од територијата на град Скопје и ќе биде организиран семинар за мотиватори-крводарители од различни националности со цел подигнување на свеста за важноста на чинот за дарување на крв. Покрај тоа, ќе бидат дистрибуирани 100 пакети за ранливо население, донација од Рамстор, а ќе се одржаат и дисеминациски сесии за различни целни групи за Движењето, за принципите и за Женевските конвенции.
Светскиот ден на Црвениот крст и Црвената полумесечина се одбележува во сите 188 национални друштва во чест на основололожникот и инцијаторот за формирање на Движењето на Црвениот крст и Црвената полумесечина Анри Динан, швајцарски трговец, роден токму на 8 мај.
Во 1863 година, својата идеја за формирање на хуманитарната организација Анри Динан, ја претставил во неговата историска книга „Сеќавања за Солферино“ по што е создаден Меѓународниот комитет на Црвениот крст и се основани првите Национални друштва. Во 1864 година е усвоена Првата женевска конвенција.
Организацијата е создадена на 17 февруари 1863 година од филантропот Анри Динан, правникот Густав Моание, лекарите Луи Апиа и Теодор Моноар, и генерал Гијом-Анри Дифур. Веднаш потоа се оформуваат принципите на работа на Комитетот, вклучувајќи ја и неутралната улога.
Црвениот крст е најмасовна хуманитарна организација во светот која постојано делува на планот на справување со најразлични итни состојби како што се укажување на помош на ранетите, болните, воените заробеници, цивилите итн.