Остана недообјаснет твитот на евркомесарот, Јоханес Хан, кој беше објавен вчера по завршувањето на лидерската средба во Брисел, каде Хан изразува разочараност дека „некои“ страни во разговорите покажале неодговорност и недостаток на лидертство.
Портпаролката на ЕУ за надворешни работи и безбедносна политика, Маја Коцијанчиќ, на барање да прецизира на кого мислеше еврокомесарот, одговори дека сите страни имаат одговорност за решавање на политичката криза и порача што е можно побрзо да се дојде до компромис.
-Постојат различни нивоа на одговорност и нема да истакнам или да именувам ниту едно од нив. Должност е на сите партии да најдат конечен политички компромис без никакво одложување и да дадат конкретни предлози за финализирање на преговорите кои се засноаваат на договорот од 2-ри јуни – вели Коцијанчиќ.
"No final deal yet in talks on frm. Yugoslav Republic of #Macedonia. Very disappointed about lack of responsibility+leadership by some." 1/2
— Johannes Hahn (@JHahnEU) June 10, 2015
"Citizens deserve better: democracy, the rule of law, and a European future. We won't give up!" 2/2
— Johannes Hahn (@JHahnEU) June 10, 2015
Веднаш по првиот твит на Хан следеше втор каде тој порача дека граѓаните на Македонија заслужуваат подобро: демократија, владеење на правото и европска иднина. Тој порача дека ЕУ не се откажува и покрај неуспешната 12-часовна средба.
Андеја Стојковски и Бојан Маричиќ од Македонски центар за европско образование, сметаат дека Груевски има поголема одговорност за исходот на преговорите затоа што во него е сконцентрирана моќта.
-Одговорноста паѓа на тој што ја има моќта, во случајов опозицијата нема моќ да смени нешто во државата. Изјавата на Хан може да реферира само на власта затоа што со моќта доаѓаат одговорностите – вели Стојковиќ.
Маричиќ смета дека со двата твита се прави баланс во притисокот што Европксата комисија се обидува да го изврши врз преговорачките страни.
-Тоа се два врзани твитови што значи дека е порака за двете страни. Едните да бидат попопустливи во преговарањето, мислејќи на опозицијата. Другата страна, пак, според вториот твит, треба да сфати дека не смее да се оди против овие принципи на демократијата. Сепак притисокот треба да биде насочен кон Груевски затоа што одговорноста е кај него – вели Маричиќ.
Преговорите завршија без конкретен резултат затоа што двете страни не попуштија од своите цврсто втемелени позиции. Заев бара оставка од Груевски како предуслов за формирање на преодна владата која ќе управува со земјата во транзициониот период, додека Груевски ова барање го нарекува „невозможен услов“. По средбата лидерите на двете партии меѓусебно се обвинуваат за неуспехот на истата.
Маја Васева