Земјите од Западниот Балкан прво ќе треба економски да се обединат и да создадат еден заеднички пазар, за да можат да влезат во ЕУ.
Ова е пораката на еврокомесарот за проширување, Јоханес Хан од Париз кој најави финансиска помош од 150 милиони евра за транспортни и енергетски проекти за земјите во регионот, но меѓу нив не се најде Македонија.
ЕУ 96 милиони евра ќе додели за железнички проекти во Србија, Албанија и Косово и уште 50 милиони евра за зелени проекти.
Хан, во своето обраќање на бизнис-форумот во рамките на Самитот за Западен Балкан во Париз, со ниту еден збор не ја спомна Македонија, за разлика од Црна Гора, Албанија, Србија и од Косово.
Потенцијалот за поврзување на трите држави ќе биде искористен само ако ги извршат неопходните реформи.
Ова е втор ладен туш за македонската Влада, откако ЕУ суспендираше 27 милиони евра од ИПА-фондовите наменети за Македонија.
Како главна причина за санкциите беше наведена политичката криза и неодговорноста на властите кои не покажуваат волја за спроведување на реформите.