Коронаврусот бил причина за смрт на повеќе од триесетмина лекари, сестри и друг здравствен персонал кај нас. По смртта на лекарот Сенат Грбовиќ минатата недела, „А1он“ побара од Министерството за здравство бројка на лекари, медицински сестри, болничари и хигиеничари кои како здравствени работници се заразиле и починале поради последици од Ковид – 19. Од Министерството испратија само вкупна бројка на починати здравствени работници од Ковид – 19.
„Заклучно со 18.04.2021 година, според извештајот на Институтот за јавно здравје за состојба со Ковид – 19 во државата, од случаите кои се епидемиолошки истражени, регистрирани се 3.439 (4,8%) случаи на заболување меѓу здравствени работници. Заклучно со 04.01.2021, пријавени се 29 смртни случаи кај здравствени работници. Министерството за здравство е отворено за помош или каква било поддршка на секое семејство на здравствени работници“, велат од Министерството за здравство за „А1он“.
Во 29 – те здравствени работници за кои Министерството вели дека починале од Ковид – 19 не се лекарот Грбовиќ, поранешен вработен во скопската Итна медицинска помош, кој од почетокот на годинава работел во „Биотек“, а почина во петокот, оти нивната статистика е заклучно со четврти јануари годинава. Во статистиката не се влезени ниту невропсихијатарот Предраг Кировски кој како последица на Ковид – 19 почина на 25 март, годинава и медицинската сестра Нашиде Емини од Градската општа болница „8 Септември“ која почина на 14 јануари.
Најмлада меѓу починатите здравствени работници е 40 – годишната медицинска сестра Ирена Дојчиновска – Милошевска од Геронтолошкиот завод „13 Ноември“ во Скопје. Таа почина на 17 декември лани, а беше погребана следниот ден, на нејзиниот роденден.
Првиот лекар кај нас, кој почина од коронавирус, е 64 – годишниот уролог од Тетово, Арификмет Деари. Тој почина на 5 јули 2020, неколку месеци пред предвиденото пензионирање.
Од Клиничката болница во Тетово, неколку месеци подоцна, на 07.11.2020 почина радиологот Владимир Евтимовски.
Во ист ден, лани на 5 декември, како последица од Ковид – 19 животот го изгубија матичниот лекар во Крушево, Вангел Трајчулески и 55 – годишна медицинска сестра од Битола, вработена во хируршкото одделение на Болницата.
Вкупната бројка на починати од Ковид – 19 кај нас е 4.714, а од почетокот на пандемијата заразени се 150.672 лица.