Претставници од државниот врв на Македонија и оваа година ќе присуствуваат на Молитвен појадок во Вашингтон, каде што учествува и претседателот на САД, Доналд Трамп, тврдат за „Макфакс“ од Собранието и Владата.
Тие демантираат дека Македонија не е поканета на појадокот каде што присуствуваат фисоки функционери, дипломати и претставници на повеќе од 140 земји од светот, кои ја користат оваа можност да разменат мислења, искуства и ставови за глобалните случувања и предизвици.
Информациите велеа дека покана нема бидејќи Македонија е меѓу 128-те држави коишто се спротивставија на САД, на итната седница на Генерално собрание на Обединети нации каде што се гласаше против одлуката на Соединети Американски Држави да го прогласат Ерусалим за главен град на Израел.
„Во Владата пристигна покана за учество на Молитвен појадок во Вашингтон и истата беше адресирана на име на премиерот. Сè уште не сме сигурни дали тој ќе присуствува, а тоа зависи од неговата агенда“, изјавија ов Владата за „Макфакс“.
Од Собранието исто така велат дека пратениците се подготвуваат да заминат за Вашингтон, првиот четврток од февруари. За разлика од изминатите години, кога како прв човек на Собранието, експретседателот Трајко Вељаноски беше на молитвените појадоци, оваа година покана нема за Талат Џафери.
„Од Собранието ќе присуствуваат тројца пратеници. Александар Кирацовски од СДСМ, Артан Груби од ДУИ и Владимир Ѓорчев, ВМРО-ДПМНЕ“, велат од собраниските служби.
Покрај централната церемонија која ќе ја отвори Трамп, организирани се и цела низа настани и активности, како надополнување на целата манифестација.
К. Ландов