Американскиот претседател Доналд Трамп ги откажа предизборните собири во Канзас и Ајова, планирани за овој викенд, во пресрет на конгресните избори на 3 ноември. Наместо настапи пред присутните, ќе одржи серија телефонски предизборни собири. Одлуката отвори прашања за неговото здравје и заморот по интензивната кампања, пишува „Мирор“.
Вчера, по враќањето од предизборен собир во Јужна Каролина, Трамп го навреди новинарот на Ројтерс, Џејкоб Боџејџ, кој го праша дали се откажал од патувањето во Канзас затоа што му здодеало постојаното патување.
Q: "You not going to Kansas has nothing to do with you being sick of travel?"
President Trump: "You’re sick to ask that question. You are sick…I don’t feel I have to go to Kansas…I feel perfect. You are disgusting. Put yourself in shape. You look like hell!" https://t.co/8jfPolxExW
— CSPAN (@cspan) October 29, 2026
Новинарот најпрво го праша како се чувствува по бројните патувања и каква е неговата здравствена состојба. Трамп одговори дека се чувствува многу добро и изрази уверување дека републиканците ќе постигнат добар резултат на изборите.
Но, кога новинарот го праша дали откажувањето на собирот во Канзас е поврзано со заморот од патувањата, Трамп бурно реагираше.
„Болен си што поставуваш такво прашање. Ти си болен“, му рече Трамп, а потоа го праша за која медиумска куќа работи.
„Погледнете го овој човек. Воопшто не е во форма“, додаде Трамп, пред да објасни зошто нема да патува во Канзас.
„Не одам во Канзас затоа што нему му оди многу добро. Ќе одржам телефонски собир. Утре одам на Флорида. По 28 собири, тој ме прашува која е причината. Знаете која е причината? Не мислам дека треба да одам во Канзас“, рече Трамп, мислејќи на републиканскиот сенатор Роџер Маршал.
На крајот повторно му се обрати на новинарот на Ројтерс.
„Ме следиш веќе две недели. Се чувствувам совршено. Одвратен си, доведи се во форма, изгледаш ужасно“, му порача Трамп.
Трамп утре требаше да одржи собир во Салина, во Канзас, каде што републиканскиот сенатор Роџер Маршал се бори за нов мандат. Маршал се соочува со сериозен предизвик од демократскиот кандидат Адам Хамилтон, кој според некои анкети има предност.
Откажан е и собирот закажан за недела во Дубјук, во Ајова. Републиканскиот национален комитет соопшти дека Трамп наместо тоа ќе учествува на повеќе телефонски предизборни собири во различни сојузни држави.
Од почетокот на октомври Трамп одржа 25 собири во 19 сојузни држави, обидувајќи се да ја зголеми поддршката за републиканските кандидати. Републиканците на изборите во вторник се обидуваат да ја задржат контролата врз двата дома на американскиот Конгрес.
Здравствената состојба на 80-годишниот американски претседател во последните месеци е сè почесто предмет на јавен интерес.
„Волстрит џурнал“ неодамна објави дека неговиот личен лекар Шон Барбабела или некој од неговите колеги мора постојано да биде на растојание од кое може да стигне до претседателот за најмногу три минути.
Според истиот извештај, вработените во Белата куќа обично ја напуштаат просторијата кога Трамп разговара со својот лекар. Лице запознаено со работата на Барбабела го опишало неговиот пристап како ненаметлив и директен.
Белата куќа претходно потврди дека Трамп има хронична венска инсуфициенција, состојба што го отежнува враќањето на крвта од нозете кон срцето и може да предизвика отекување на глуждовите.
Модринките на неговите раце беа објаснети со честото ракување и употребата на аспирин. Лекарот на Трамп во мај објави дека претседателот е во одлична здравствена состојба.