Вкупно 236 судии со право на глас до 15 часот гласаат за избор на двајца нови членови на Судскиот совет. Своето избирачко право судиите можат да го остварат во изборната единица во Врховен суд и во 12 избирачки места од апелациско подрачје на Скопје и управните судови.
Наќе Георгиев е единствен кандидат за член кој доаѓа од Врховен суд, додека на на листата за членови од скопското апелационо подрачје кандидати се Антоанета Димовска од Граѓанскиот суд во Скопје и Лазар Нанев судија од Основниот суд во Кавадарци.
За Георгиев, чија сопруга е обвинител, а синот заврши академија за судии и обвинители, се водеше дисциплинска постапка за утврдување одговорност за нестручно работење за периодот додека бил претседател на Апелацискиот суд во Штип, но Судски совет донесе одлука да запре постапката.
Судијката Антоанета Димовска е сестра на пратеничката Снежана Калевска Ванчева од СДСМ и доаѓа од скопскиот граѓански суд каде претходно беше кандидат за уставен судија, но Судски совет не ја поддржа.
За Лазар Нанев има отворено постапка во судскиот совет откако обвинители во Кавадарци го пријавиле дека им се заканува и не ги пушта во судница на рочишта. Тој доби право да влезе во трката откако Судски совет му го прифати приговорот за избор на кандидатски листи.
Нови членови во Судскиот совет се бираат на местата на на врховната судијка Мирајна Радевска Стефкова и апелациониот судија Зоран Герасимовски кои поднесоа оставки затоа што не се согласуваа со работењето на советот.