Шефот на македонската дипломатија Никола Димитров денеска по средбата со претседателот Ѓорге Иванов потенцира дека за решавање на спорот за името со Грција е потребно лидерство и највисока одговорност на сите политички фактори.
Претседателот Иванов денеска го прими Димитров, а на средбата, како што соопшти МНР, станало збор за последните случувања околу преговорите меѓу Македонија и Грција околу името.
– За ова исклучително значајно прашање за разликата околу името, прашање што не влече надолу и ни ја попречува иднината повеќе години, потребно е лидерство и највисока одговорност од сите политички фактори. Доколку најдеме начин да го затвориме овој проблем со зачувување на идентитетот и достоинството, сите заедно, ќе бидеме на правата страна на историјата, нагласил Димитров по середбата.
Димитров информирал за содржината на последните разговори со шефот на грчката дипломатија Никос Коѕијас.
Претходно со соопштение од средбата излезе и Кабинетот на шефот на државата и како што соопшти кабинетот на Иванов, Димитров усно го информирал за последните случувања поврзани со разговорите за прашањето за разликата околу името, без притоа да приложи каков било писмен документ.
-Целиот процес наликува на личен договор меѓу премиерот Заев и премиерот Ципрас, за што нема обезбедено национален консензус во Република Македонија. Мојот став е дека не прифаќам решение за прашањето за името за севкупна употреба или ерга омнес, изјавил македонскиот претседател на средбата.
Иванов потенцирал дека склучување меѓународен договор треба да биде во согласност со Уставот на Република Македонија, а не да предвидува негова измена.