Вкупно 12 тони средство за дезинфекција „мултисепт форте“, спакувано во 1.200 канистери од 10 литри, денеска донира Друштвото за информатичка технологија „Сеавус“ за потребите на Македонскиот полициски синдикат, односно за дезинфекција на просториите и возилата на Министерството за внатрешни работи, Агенцијата за национална безбедност, Агенцијата за разузнавање, Управата за финансова полиција и за противпожарните единици во целата држава.
Како што соопшти МПС, компанијата „Сеавус“ одговорила позитивно на барањето на Македонскиот полициски синдикат и посочуваат дека со оваа донација ќе придонесуваат кон подигање на степенот на заштита на чуварите во Републиката.
Од Синдикатот информираат дека уште од денес ќе почнат да ги дистрибуираат во сите објекти на Министерството за внатрешни работи, Агенцијата за национална безбедност, Агенцијата за разузнавање, Управата за финансова полиција и во противпожарните единици во Република Северна Македонија, а сè со цел навремена дезинфекција на сите простории и сите возила што ги користат вработените во овие институции.