Претседателот на СДСМ заедно со генералниот секретар Љупчо Николовски денеска е во посета на Тиквешкиот регион.
Во рамки на агендата, Заев и Николовски беа во посета на винарницата „Тиквеш“ каде се сретнаа со лозари и производителите на вино од овој регион.
Во изјава за медиуми дадена од Неготино, претседателот Заев се осврна на мерките и политиките што СДСМ ги презема за лозарите и земјоделците.
„Денеска, на празникот Свети Трифун сме во посета на Тиквешкиот регион препознатлив по лозарството и производството на вино, кои се далеку прочуени како висококвалитетни производи.
Во разговорите со лозарите и производителите на вино заеднички се сложивме дека има простор за уште поголема поддршка и помош кон оваа земјоделска гранка која е и тоа како значајна за нашето стопанство.
Во изминатите две и пол години како централна и локална власт покажавме што значи вистинска грижа за земјоделците, вклучително и лозарите.
Конкретно овде, во Тиквешијата, државата презеде обврска и го реши долгогодишниот проблем со предаденото а неплатено грозје во приватните винарници.
Денес долгот кон овие лозари е исплатен. Се исплатија над 1,2 милиони евра кон над 2.000 лозари од овој регион”, истакна Заев.
“Со измените на Законот за вино се олеснуваат условите за производство на вино на малите винарници и на физичките лица производители на вино, што е тековен тренд во светски рамки и влијае позитивно на развојот на винскиот и руралниот туризам.
Сите измени се во насока на остварување на поголеми приходи за визбите и за лозарите, но и поголем извоз на вино и девизен прилив.
Преку низа на реални мерки и политики сериозно вложувавме во земјоделството и тоа ќе продолжиме да го правиме и во иднина.
Продолжуваме да се бориме за нови пазари, да обезбедуваме сигурен пласман и добри откупни цени”, рече Заев.