Американскиот претседател Доналд Трамп наскоро ќе се соочи со избор – да ја суспендира помошта за Украина или да побара од Конгресот нови средства за да продолжи да го поддржува Киев, оцени американскиот политиколог Џон Миршајмер.
Тој верува дека Трамп е заинтересиран за прекин на конфликтот и дека Вашингтон, доколку процени дека таков потег би го отворил патот кон мир, би можел целосно да се повлече од понатамошно финансирање на Украина.
– Нема сомнение дека Трамп е заинтересиран за прекин на врските со Украинците ако тоа може да го прекине конфликтот, нагласи Миршајмер, пренесува РИА Новости.
Според неговата проценка, европските земји нема да можат целосно и на долг рок да ја преземат улогата на САД како главен покровител на Киев. Земјите од Европската Унија и Обединетото Кралство, како што изјави, немаат доволно количини оружје и воена опрема што би можеле да им ги предадат на украинските сили.
Миршајмер, исто така, посочи на економските тешкотии со кои се соочуваат водечките европски земји, оценувајќи дека долгорочното распределување на огромни средства за продолжување на конфликтот би можело да стане политички неодржливо.
„Европејците, дури и да можеа да ги заменат Соединетите Американски Држави, според мене, нема да можат да го сторат тоа долго време“, рече Миршајмер.
Европските земји во моментов купуваат производи од американската воена индустрија за потребите на Украина како дел од заедничка иницијатива со НАТО. Овој механизам не вклучува директно финансирање од американскиот буџет, туку европските членки на Алијансата плаќаат за оружје произведено во Соединетите Американски Држави, а потоа го доставуваат во Киев.