Русија утре треба да ја испрати првата пратка дизел во САД, врз основа на спорниот договор меѓу американскиот претседател Доналд Трамп и рускиот претседател Владимир Путин.
Рускиот вицепремиер Александар Новак изјави дека танкерот ќе има капацитет од 40.000 тони, пренесе агенцијата Интерфакс. Се очекуваат и дополнителни пратки. Новак не ја исклучи можноста за извоз на дизел и во други земји, но посочи дека тоа ќе зависи од капацитетите на руските рафинерии во наредните месеци.
Трамп и Путин на почетокот на октомври договорија продолжување на руските испораки на дизел во САД. Вашингтон привремено ги суспендираше постојните санкции против Русија за да ги овозможи испораките. Договорот предизвика остри критики од Украина, Европската Унија, па дури и од дел од републиканските членови на американскиот Конгрес, додека Москва го поздрави.
Руските нафтени рафинерии често се мета на украински беспилотни летала со долг дострел, а штетите и поправките ги ограничуваат производствените капацитети на земјата. Москва одговори со воведување забрана за извоз на бензин и дизел.
Трамп ги критикуваше украинските напади, обвинувајќи го Киев за растот на цените на горивата во пресрет на ноемвриските конгресни избори во САД, на кои се очекува слаб резултат за републиканците.
Од друга страна, Киев тврди дека нафтените постројки се легитимни воени цели бидејќи обезбедуваат гориво и финансиски средства за војната на Путин. Украина од февруари 2022 година се брани од руската сеопфатна инвазија.