Американскиот претседател Доналд Трамп изјави дека не верува оти Кина или Русија го снабдуваат Иран со оружје, повикувајќи се на уверувањата што, како што тврди, ги добил од лидерите на двете земји.
„Претседателот Си на нашата неодамнешна средба во Пекинг ми рече дека Кина под никакви околности нема да ја снабдува или продава оружје на Исламската Република Иран. Тоа важи и за кинеските компании“, напиша Трамп на својата социјална мрежа Truth Social.
„Со оглед на нашиот однос, му верувам на збор и му правам многу голема услуга“, додаде тој.
Трамп истакна дека и рускиот претседател Владимир Путин му рекол дека Москва нема да продава оружје на Иран.
„Тој разбира дека јас не ѝ продавам оружје на Украина, туку на земјите-членки на НАТО. Тие ја плаќаат целосната цена, а што понатаму се случува со тоа оружје, не знам“, напиша Трамп.
Според него, двете земји кои најчесто се споменуваат во контекст на Иран не учествуваат во негово вооружување.
„Ако го прават тоа, тоа би било многу лошо за нив. Сигурно не би било во нивен интерес“, порача американскиот претседател.
Претходно оваа недела, американскиот министер за одбрана Пит Хегсет на сослушување во Сенатот изјави дека Кина и Русија, „на различни нивоа“, овозможиле дел од активностите на Иран за време на војната.
„Постојат многу начини на кои се обидуваме да го спречиме тоа, но длабочината и обемот на тие активности мора да останат доверливи. Сепак, постојат начини на кои двете земји, секоја на свое ниво, овозможуваат дел од она што го прави Иран“, изјави Хегсет пред Сенатската комисија за буџетски средства.