Иранскиот Корпус на исламската револуционарна гарда (ИРГГ) објави дека неговите воздухопловни сили извршиле напад врз американски радарски систем за рано предупредување во Бахреин, тврдејќи дека објектот е уништен. Централната команда на САД (CENTCOM) ги демантираше овие тврдења, потврдувајќи дека кон Бахреин биле испратени две ирански беспилотни летала, но дека и двете биле пресретнати и соборени.
Според соопштението на Револуционарната гарда, пренесено од иранските државни медиуми, операцијата била спроведена како одговор на американски воздушен напад врз телекомуникациска кула во градот Сирик, во јужната иранска провинција Хормозган, што се случил на 12 ноември.
„Припадници на воздухопловните сили на Корпусот на исламската револуционарна гарда го нападнаа и уништија американскиот радар за рано предупредување на островот Бахреин, како одговор на непријателска воздушна агресија врз телекомуникациска кула во Сирик“, се наведува во соопштението на иранската воена формација.
Револуционерната гарда го предупреди Вашингтон дека секој нов напад врз иранска територија ќе предизвика одговор, нагласувајќи дека нејзините сили се подготвени да дејствуваат без географски ограничувања.
„Ова служи како сериозно предупредување до непријателот да стави крај на воздушните провокации и шверцот со нафта во Ормускиот теснец. Доколку нападите се повторат, воздушните сили на Револуционерната гарда се подготвени да одговорат без географски ограничувања“, соопштија од Техеран.
Сепак, Централната команда на САД (CENTCOM) извести дека иранскиот напад не предизвикал никаква штета.
„Корпусот на исламската револуционерна гарда лансираше два еднонасочни напаѓачки дрона кон Бахреин; двата беа соборени од американските сили. Немаше жртви ниту материјална штета“, наведоа од CENTCOM.
Нема независна потврда за уништување на американски радарски систем.
Овој најнов инцидент претставува продолжување на воениот конфликт што започна на 28 февруари со напади на САД и Израел врз Иран, на што Техеран одговори со напади со ракети и дронови врз американски воени објекти и други цели низ Блискиот Исток. Меѓу целите со висок приоритет за иранските сили беа радарските системи, кои го сочинуваат столбот на американската воздушна и ракетна одбрана во регионот.
Во досегашните борби, иранските сили погодија неколку радарски постројки, вклучувајќи ги системите AN/FPS-132 и AN/TPY-2, кои се користат за откривање и следење на балистички ракети на големи растојанија. Според проценките на воени извори, вредноста на поединечните системи достигнува стотици милиони долари, додека вкупната вредност на радарската инфраструктура за која се известува дека е уништена или оштетена, достигнува неколку милијарди долари.
Од особено значење е радарот AN/FPS-132 во Катар – еден од најкритичните американски системи за рано предупредување распоредени надвор од територијата на САД. Во извештаите за претходните напади се споменуваат и радарите AN/TPY-2 во Јордан и Обединетите Арапски Емирати, како и системите AN/FPS-117 во Саудиска Арабија. Иако ирански извори тврдат дека неколку од овие објекти се уништени, целосниот обем на загубите и оперативниот статус на секој поединечен систем не се независно потврдени.
Од воена гледна точка, оштетувањето на радарите за рано предупредување повлекува последици што се далеку посериозни од самата материјална вредност на објектите. Овие системи овозможуваат откривање на лансирања на ракети, следење на нивните траектории и навремено активирање на ракетната одбрана. Нивното губење може да го намали времето достапно за реакција и да ја зголеми зависноста од други извори на радарски податоци, вклучувајќи ги системите на воените бродови и радарските станици во соседните земји.
Како резултат на тоа, радарските инсталации станаа приоритетна цел во рамките на иранската стратегија насочена кон слабеење на военото присуство на САД во Персискиот Залив.
Сериозноста на последиците од иранските напади дополнително беше истакната во септември, кога американската телевизиска мрежа „Си-Би-Ес Њуз“ (CBS News) објави фотографии од оштетени воени објекти во Саудиска Арабија и Кувајт.
Фотографиите им беа доставени на новинарите од припадници на вооружените сили на САД, кои побараа да останат анонимни поради ограничувањата поврзани со комуникацијата со медиумите.
На фотографиите се гледаат тешко оштетени згради, воени возила, станбени објекти и летала – вклучително и авион за рано предупредување и контрола од типот „Е-3 Сентри“ (E-3 Sentry) во воздушната база „Принц Султан“ во Саудиска Арабија, кој претрпел катастрофални оштетувања на задниот дел од трупот. Американските војници што ги доставија фотографиите изразија незадоволство од нивото на заштита обезбедено за воените објекти, како и од начинот на кој јавноста беше информирана за последиците од иранските напади.
„Ова е огромна штета врз нашите бази – штета за која американската јавност не е информирана. Едноставно стоиме овде со затворени очи и примаме удари директно во лице“, изјави еден од американските војници за „Си-Би-Ес“.
Други припадници на вооружените сили на САД, исто така, предупредија на ранливоста на воената инфраструктура на напади со ирански ракети и беспилотни летала.
За обемот на штетата сведочат и наодите на американските воени надзорни органи, кои укажуваат на тоа дека стотици објекти и инфраструктурни компоненти во американските бази низ Блискиот Исток биле оштетени или уништени за време на конфликтот. Нов ризик од ескалација на конфликтот
Бахреин има особено стратешко значење за вооружените сили на САД, бидејќи таму се наоѓа седиштето на Петтата флота на американската морнарица – командата одговорна за операциите во Персискиот Залив, Арапското Море и околните поморски патишта.
Во меѓувреме, Ормускиот Теснец – витален коридор за значителен дел од светската трговија со нафта и течен природен гас – останува една од главните жаришни точки во конфликтот меѓу САД и Иран. Во текот на изминатите неколку месеци, Иран се обидуваше да го ограничи поморскиот сообраќај низ овој теснец, додека Соединетите Држави воведоа поморска блокада на иранските пристаништа.
По неуспехот на претходните обиди за дипломатско решавање на конфликтот, овој нов напад покажува дека ризикот од повторно разгорување на поинтензивни воени дејствија сè уште не е отстранет.