Во рамки на кампањата „16 дена активизам против насилство врз жени и девојчиња“, македонски поп ѕвезди лансираа песна за поддршка на ставањето крај на насилството.
Секоја втора жена во земјава се има соочено со психолошко насилство од партнерот, секоја трета била жртва на сексуално вознемирување, додека 14 отсто од жените се соочиле со физичко или сексуално насилство, покажува последното истражување за насилство врз жени, предводено од ОБСЕ. Последица на пандемијата е и пораст на случаите на домашно насилство каде најголем број од жртвите се жени.
„Не молчи, не трај, СТАВИ КРАЈ!“ е годинешното мото со кое земјава се приклучува на глобалната кампања „Обој го светот во портокалово за крај на насилството врз жени и девојчиња, сега!“.
Во рамки на кампањата, моќно одекнуваат гласовите на македонските поп ѕвезди Тамара Тодевска, Дани Димитровска, Антонија Гиговска, Светлана Јовановска, Џон Илија Апелгрин, Лука Ѓоргиевски (Фанк Шуи) и Бранко Николов (Фолтин) во песната „Очи црни“ во аранжман на Џијан Емин и препев на Диме Поповски и Васиа Поповска, со која тие сакаат да ги поканат сите мажи и жени да излезат и да пеат, да бараат, да кажат јасно, да кажат гласно – не молчи, не трај, СТАВИ КРАЈ!
Семејството на Обединетите нации, Европската Унија и Мисијата на ОБСЕ традиционално ги здружуваат силите за „16 дена активизам против родово-базирано насилство“, кампања која има за цел ставање крај на насилството врз жени и девојчиња и трае од 25 ноември – Меѓународниот ден за елиминација на насилство врз жени и девојчиња, па се до 10 декември – Меѓународниот ден на човекови права.
На централниот настан во кампањата што се одржа на 2 декември во Филхармонијата, евроамбасадорот Дејвид Гир истакна дека Северна Македонија како потписник на Истанбулската конвенција е посветена на постигнување на родовата еднаквост, преку унапредување на правата на жените и превенирајќи ги сите форми на родово насилство.
– Овој јануари земјата постигна важен прогрес, со усвојувањето на Законот за заштита од насилство врз жените, рече Гир, додавајќи дека ЕУ ќе продолжи да биде поддршка во борбата на Северна Македонија кон родовата еднаквост.
На настанот, Росана Дуџак, постојаниот координатор на ОН во земјава, посочи дека триесет години по основањето на иницијативата за „16 дена против насилство“, време е свеста да ја трансформираме во акција, како и дека „насилството врз жените и девојчињата не е неизбежно. Може да се сопре! Мора да се сопре!“.