Понуди и резервации за дочек на новогодишната ноќ во рестораните и кафулињат нема, но за оние предновогодишни организирани прослави од фирмите, сопствениците на угостителските објекти велат дека се приватна работа. Според нив со почитување на протоколите за објектите ќе можат да се реализираат овие собирања.
„Не може да одговориме дали ни се јавуваат за организирани предновогодишни прослави од фирмите.Тоа е наша приватна работа, но секако на овие прослави ќе се почитуваат пропишаните мерки, односно не може на една маса да седат повеќе од четворица а масите мора да бидат одалечени најмалку метар и половина. Новогодишен дочек нема да има па ова е можност на некој начин луѓето да прослават во деновите пред истекот на годината“, речиси едногласно ни одговорија менаџерите на ресторани и локали во земјата.
Државниот пазарен инспекторат не добил дополнителни насоки од Владата за посебен инспекциски надзор во деновите пред најлудата ноќ.
Неодамна, министерот за здравство Венко Филипче рече дека Комисијата за заразни болести дополнително ќе разговара за евентуалните ограничувања за работата на угостителските објекти за Нова година.
Што се однесува до понудите за патувања од туристичките агенции, најголем интерес има за неколкудневен престој на планините во државава но и во соседството. Во понудите стои организирана вечера за 31 декември но таа треба да заврши до 21 часот.
Помал интерес има за организираните патувања во Истанбул, Барселона, Кушадаси, Дубаи но сите аранжмани вклучуваат ноќевања во хотелите а новогодишната ноќ може да се прослави на плоштадите во овие градови според пропишаните протоколи за заштита од Ковид-19.
„Зависно од актулената епидемиолошка слика во градот во кој ќе престојувате за новогодишните празници, ќе биде организиран дочекот на Новата година на плоштадите“, пишува во понудите на туристичките агенции за посочените дестинации.
Годинава за прв пат новогодишната прослава на централните плоштади ја откажаа мегалополисите како Лондон, Њујорк и Сиднеј, додека од јавна прослава на најлудата ноќ не се откажаа Белград и Скопје.