Истрага спроведена од федералните власти на Илиноис ги потврди наводите на повеќе од 1.900 жртви на злоупотреба на деца извршени од католичкото свештенство на американската сојузна држава, објави на прес-конференција јавниот обвинител Кваме Раул. Истрагата траеше пет години и откри повеќе стотици случаи отколку што првично објавија парохиите.
Претходникот на Раул, поранешната јавна обвинителка на Илиноис, Лиза Мадиган, почна да го истражува степенот на сексуална злоупотреба од страна на свештенството на државата во 2018 година, откако извештајот на големата порота во Пенсилванија документираше злоупотреба на 1.000 малолетници во шест епархии во таа држава. Откритијата на извештајот ги шокираа епархиите низ САД, а бројни државни обвинители ветија дека ќе ги истражат свештениците во нивните држави.
Во тоа време, католичките бискупии во Илиноис јавно наведоа само 103 докажани случаи на сексуална злоупотреба на деца, соопшти канцеларијата на јавниот обвинител.
Истрагата вклучи шест епархии од Илиноис кои покриваат 3,5 милиони католици. Инспекторите ги потврдија наводите за сексуална злоупотреба на деца против 451 свештеник и верски браќа. Најголем број имало во Чикаго каде имало 150 пријавени насилници и Џолиет со 52 пријавени насилници. Бидејќи некои пријавени насилници биле евидентирани во две епархии, пријавени се вкупно 494 докажани злоставувачи, се вели во извештајот.
Некои од овие свештеници имале по една жртва, други десетици. Еден од нив, кој почина во 2015 година, малтретирал 36 деца додека служел во Епархијата Девенпорт, Ајова, и во Џолиет пред да се пензионира во 2005 година. Друг малтретирал две деца во бискупијата Пеорија. Свештеник силувал 10-годишно девојче во својата училница, според извештајот.
Длабочината и широчината на сексуалната злоупотреба варираа, како и казните што ги добиваа. Во многу случаи, наводите беа пријавени, но не беше постапено. Во 1993 година, две жртви обвинија свештеник во бискупијата во Чикаго за злоупотреба, но надзорната комисија не препорача негова казна.
Наместо тоа, тој бил надгледуван од свештенството и сѐ уште му е дозволено да се сретнува со тинејџери. Најмалку уште три жртви пријавиле малтретирање од страна на свештеникот додека тој не бил отстранет од свештенството во 2002 година – речиси една деценија подоцна, се вели во извештајот.
Свештеникот обвинет за малтретирање на бројни момчиња кај парохиските деца бил познат како „Среќни раце“, но со години избегнувал казна. Обвинителите често одбиваа да отворат случај.
„Нашата одлука беше да не ги ставиме децата во никаков правен процес бидејќи веруваме дека нашата цел може да се постигне без тоа“, рече еден од државните правобранители на парохијаните кои пријавија злоупотреба.
Свештеникот се преселил од парохија во парохија откако започнаа обвинувањата против него во 1990 година, но ја напуштил Католичката црква дури во 2008 година, се вели во извештајот. Тој никогаш не бил казнет за неговите наводни злоставувања, се вели во извештајот, и наместо тоа живее во „својата куќа, истата резиденција каде што толку пати бил обвинет за злоставување момчиња“.
Најмалку 1.997 жртви пријавиле дека биле малтретирани од свештенството од Илиноис, се вели во извештајот. Речиси сите од нив се бореа со проблеми со менталното здравје, покажа извештајот, при што некои се свртеа кон алкохол и зависност, а други страдаа од вознемиреност и чувство на безвредност. Некои се бореле со самоубиствени мисли, додека други се занимавале со физички, здравствени и финансиски проблеми.
Бискупот Томас Џон Папроцки од бискупијата во Спрингфилд по откритијата изјави дека „не се запознаени за никаков инцидент на сексуална злоупотреба на малолетник од страна на свештеник што наводно се случил во оваа епархија во последните 20 години“. Тој, исто така, рече дека епархијата е „целосно посветена да стори сé што може за да спречи злоупотребата да се повтори“.
Останатите шест епархии издадоа заедничка изјава во која ја истакнаа нивната посветеност за подобрување на транспарентноста и ефективноста на нивните политики. Конференцијата на католичките бискупи на Соединетите држави сè уште не ги коментираше наодите од извештајот.