Најмалку 42 лица погинаа во жестоките борби меѓу исламистичките бунтовници и екстремистите од Исламска држава во сириската провинција Дамаск.
-Во ридестиот регион Каламун погинаа најмалку 30 бунтовници и 12 борци на ИД, соопшти сирискиот Центар за мониторинг на човековите права со седиште во Лондон, а пренесуваат француските медиуми.
Каламун е поделен така што западниот дел, што граничи со Либан, е под мнозинска контрола на сириската Влада и нејзините сојузници од либанското шиитско движење Хезболах, додека во источниот дел се водат борби меѓу бунтовниците и ИД.
Источниот дел има стратешко значење бидејќи излегува на сириската степа. Овој простор го користат бунтовниците за пренесување оружје од турската граница на север и од јорданската граница на југ.
Според Центарот, ИД веќе пресече еден од овие патишта.
Во меѓувреме, вчеравечер погинаа 13 цивили, од кои деветмина се деца, а инцидентот се случи во северозападната провинција Идлиб, пренесува Б92.