Унгарскиот Парламент денеска го реизбра Виктор Орбан за премиер на Унгарија, откако неговата партија Фидес извојува убедлива победа на парламентарните избори минатиот месец, освојувајќи две третини од пратеничките мандати.
„За“ изборот на Орбан гласаа 130 пратеници од Фидес и нејзиниот коалициски партнер Христијанско демократската народна партија, а „против“ се изјаснија 57 претставници на опозицијата.
По изборот, Орбан положи заклетва и најави дека ќе продолжи со политиката што ја спроведуваше и во претходните четири години.
За време на Владата на Орбан, Унгарија забележа значаен економски раст, но во исто време се соочува и со постојани критики за непочитување на демократските стандарди.