Претседателката на Европската комисија, Урсула фон дер Лајен, ги коментираше тарифите на Трамп во видео обраќање на неколку јазици: на англиски, германски и француски.
Американските тарифи се „тежок удар“ за глобалната економија и Европската унија подготвува контрамерки доколку преговорите не успеат, рече Фон дер Лајен.
„Веќе го финализираме првиот пакет контрамерки како одговор на царините за челик“, рече таа во изјавата прочитана во Самарканд, Узбекистан, пред Самитот на партнерството меѓу ЕУ и Централна Азија.
„Дополнително подготвуваме нови контрамерки за заштита на нашите интереси и нашите компании доколку преговорите не успеат“, заклучи таа.
Фон дер Лајен вели дека последиците од американските царини ќе бидат „огромни“.
„Глобалната економија ќе претрпи голема штета, неизвесноста ќе се зголеми и ќе се поттикне понатамошен протекционизам. Последиците ќе бидат страшни за милиони луѓе ширум светот, особено за најранливите земји кои сега се предмет на највисоките американски царини“, рече Фон дер Лејен.
„Милиони граѓани ќе се соочат со повисоки сметки за намирници, лековите ќе поскапат, како и транспортот. Инфлацијата ќе расте“, рече таа.
На прес-конференција, таа додаде дека сите компании, „големи и мали, ќе страдаат уште од првиот ден“, погодени од прекини во синџирот на снабдување, поголема несигурност и тешка бирократија.
„Трошоците за водење бизнис со САД драстично ќе се зголемат“, рече таа.
„Покрај тоа, се чини дека нема ред во овој хаос. Нема јасен пат низ сложеноста и хаосот што ги погодува сите трговски партнери на САД“, истакна Фон дер Лајен.
„Ако нападнете еден од нас, напаѓате сите нас“, рече Фон дер Лајен, нагласувајќи ја заедничката позиција на Европа.
„Заедно сме во ова: ако нападнете еден од нас, ќе не напаѓате сите нас“, рече Фон дер Лејен. „Нашето единство е нашата сила.
Таа нагласи дека Европа „ќе стои со оние кои се директно погодени“, истакнувајќи претходно дека некои од најранливите земји во светот го носат товарот од високите царини.
„Европа е обединета – за бизнисите, за граѓаните и за сите Европејци. Ќе продолжиме да градиме мостови со сите оние кои, како нас, се грижат за правичната трговија заснована на правила како основа за просперитет“, рече Фон дер Лајен.
Трамп претходно најави минимална царина од 10% за повеќето стоки увезени во Соединетите Американски Држави, со повисока стапка од 20% за Европската унија, што дополнително ја интензивира глобалната трговска војна која се заканува да ја зголеми инфлацијата и да го забави економскиот раст во САД и во светот.