Пакистански полицаец загина откако беа нападнати претставниците на Обединети нации кои вакцинираа деца против полио во Сваби, северозападниот дел на Пакистан.
Поради нападот вакцинацијата на децата е прекината. Во тој реон од почетокот на годината убиени се седуммина претставници на ОН.
Екипата била нападната на пат од три вооружени лица. Двете жени кои ги носеле вакцините не настрадале, туку само полицаецот, кој им бил придружба.
Пакистан, Авганистан и Нигерија се единствените земји во светот каде детската парализа е честа болест. Вакцината против полио во овие земји често се спречува од конзервативните свештеници, кои тврдат дека вакцината содржи елементи од свинско месо, а според други дека вакцината влијае на плодноста.
Вакцинирањето во Северозападен Пакистан беше прекинато кон крајот на декември кога беа убиени девет лица кои учествувале во кампањата. Потоа властите одлучија вакцинирањето да биде обезбедувано од полицијата.
За нападите се уште никој нема преземено одговорност, додека талибанците тврдат дека вакцинирањето на децата е параван за шпионите.