Европскиот суд за човекови права ја осуди Унгарија за ограничување на слободата на изразување на пратениците, кои биле санкционирани откако го искажале своето несогласување со одредени предлог-закони.
Седуммина пратеници од две мали опозициски партии беа казнети со парични казни од 170 до 600 евра поради учество во импровизирани демонстранци во пленарната сала против предлог-закони доставени од Владата на Виктор Орбан.
Дел од пратениците носеа транспаренти на кои беше испишано „кражба, измама и лага“, обвинувајќи ја владејачката партија Фидес за „отстапки кон тутунската мафија при усвојувањето на законот за продажба на тутун“. Други носеа транспаренти со критики поради усвојувањето на спорниот закон за земјоделско земјиште.
Според одлуката на Судот во Стразбур. слободата на изразување е особено важна за членовите на парламентите, а акциите на двете групи пратеници не го поткопале авторитетот на унгарскиот Парламент.