Русија и Украина се на нивните први разговори од избувнувањето на конфликтот минатата недела, при што Киев побара „итен прекин на огнот“, во момент кога бројот на бегалците кои бегаат од земјата достигна над 500.000.
Додека делегациите пристигнуваа на разговори за границата меѓу Белорусија и Украина на петтиот ден од инвазијата на Москва, украинското претседателство побара прекин на огнот „и повлекување на војниците“ — што Москва речиси сигурно ќе го отфрли.
„Јас навистина не верувам во исходот од оваа средба, но нека се обидат“, изјави украинскиот претседател Володимир Зеленски.
Тешките финансиски санкции наметнати од Западот кон Москва го покажаа своето влијание врз финансиските пазари денеска кога руската рубља падна на рекордно ниско ниво, а руската централна банка повеќе од двојно ги зголеми каматните стапки на 20 отсто.
Санкциите насочени кон рускиот финансиски сектор имаат за цел да ја променат пресметката на лидерот на Кремљ Владимир Путин, но на терен околу 100.000 руски војници за кои се смета дека се во Украина продолжија со инвазијата од север, исток и југ.
„Руските окупатори го намалија темпото на офанзивата“, соопшти денеска генералштабот на украинските вооружени сили, повторно тврдејќи дека Москва претрпела „тешки загуби“.
Сепак, малиот јужен град Бердјанск е окупиран од руски војници, соопштија украинските власти.
Во главниот град денеска, по релативно мирната вечер, луѓето побрзаа да купат храна по укинувањето на строгиот полициски час воведен во саботата, при што локалните сили добија наредби за пукање.
Поради извештаите за понатамошни движења на руските трупи кон Киев, Москва рече дека сега „добила воздушна супериорност над целата територија на Украина“, истовремено обвинувајќи ги украинските трупи дека користат цивили како жив штит.
Путин во неделата им нареди на руските нуклеарни сили да бидат на висока готовност како одговор на, како што рече, „непријателските“ чекори на Западот, чие единство и брзина во воведувањето санкции врз руската економија ги изненади набљудувачите.
„Западните санкции кон Русија се тешки, но нашата земја го има потребниот потенцијал да ја надомести штетата“, изјави денеска портпаролот на Кремљ, Дмитриј Песков.
Агенцијата за бегалци на ОН УНХЦР соопшти дека над половина милион луѓе ја напуштиле Украина од инвазијата во четвртокот. „Повеќе од 500.000 бегалци сега побегнаа од Украина во соседните земји“, напиша на Твитер шефот на ОН за бегалци Филипо Гранди.
Киев првично не сакаше да испрати делегација во Белорусија, со оглед на улогата на земјата во олеснувањето на рускиот напад врз Украина.
„Дефинитивно имаме интерес да постигнеме некои договори што е можно поскоро“, рече Владимир Медински, помошник на Путин, кој отпатува во Белорусија на разговорите, во телевизиски коментар.
Зеленски, во меѓувреме, издаде уште едно видео обраќање, повикувајќи ја Европската унија да се согласи на „итно пристапување на Украина преку нова специјална процедура“.
Шефот на Европската комисија, Урсула фон дер Лајен, даде лична поддршка вчера во интервју за каналот Еуроњуз, но без да прецизира временска рамка.
„Тие се едни од нас и ги сакаме со нас“, рече таа.
ЕУ објави дека ќе обезбеди 450 милиони евра за Украина за купување оружје. Исто така, најави ограничувања за медиумите РТ и Спутник, управувани од Кремљ.
Новите санкции објавени во текот на викендот за руската економија имаат за цел да ја отсечат од глобалниот финансиски систем, да ја попречат трговијата со руските компании и да и нанесат длабока економска болка на земјата.
Руската централна банка денеска објави дека ја удвојува основната каматна стапка на 20 отсто, драстично зголемувајќи ги трошоците за задолжување, бидејќи ситуацијата на економијата „драстично се променила“. Вредноста на рубљата падна во однос на доларот за 20 отсто во пладневното тргување, додека Московската берза беше затворена.
Рубљата се тргуваше по цена од околу 100 за долар.
Западот спречи некои руски банки да пристапат до банкарскиот систем SWIFT, кој се користи за порамнување на меѓународната трговија, и ги замрзна средствата на руската централна банка што се чуваат во странство, лишувајќи ја Москва од пристапот до овие итни фондови.
Европската централна банка предупреди денска дека европската филијала на руската државна Сбербанк се соочува со банкрот.
Земјите-членки на ЕУ исто така го затворија својот воздушен простор за руските авиони.
Меѓународната дипломатија треба да продолжи денеска, а Генералното собрание на ОН ќе одржи ретка итна седница на која ќе разговара за конфликтот.
Напорите за меѓународно изолирање на Москва покажаа дека ФИФА нареди Русија да ги игра домашните меѓународни натпревари на неутрални терени и предупреди дека размислува да ја забрани од Светското првенство во 2022 година.
Украина пријави 352 цивилни жртви, вклучително и 14 деца, додека нејзината армија тврди дека убила 4.300 руски војници.
Русија призна дека голем број нејзини сили биле убиени или повредени, без да даде бројки.
Шефицата за човекови права на ОН, Мишел Башелет, денеска изјави дека најмалку 102 цивили, меѓу кои седум деца, биле убиени во Украина.
Путин рече дека дејствијата на Русија се оправдани бидејќи таа ги брани сепаратистите поддржани од Москва во источна Украина. Бунтовниците се борат со украинските владини сили веќе осум години во конфликт во кој загинаа повеќе од 14.000 луѓе.
Извор: МИА