Претседателот на Соединетите Американски Држави, Доналд Трамп, го помилува Ден Вилсон, поранешен затвореник обвинет за учество во немирите од 6 јануари 2021 година, по втор пат, објавија американските медиуми.
Официјален претставник на Белата куќа потврди за NBC News дека Трамп го помилувал Вилсон по втор пат затоа што „обвиненијата за оружје произлегоа од истрага поврзана со настаните од 6 јануари 2021 година“.
Вилсон првпат беше помилуван во јануари по обвиненија поврзани со немирите на Капитол Хил кога Трамп, кратко по инаугурацијата за својот втор мандат, помилува околу 1.500 други затвореници обвинети за учество во немирите од 6 јануари 2021 година.
Вилсон се изјасни за виновен во мај 2024 година за три кривични дела, вклучително и обвиненија за попречување или повредување на полицаец, за инцидентот од 6 јануари 2021 година во американскиот Капитол и за поседување оружје во Кентаки во 2023 година кога неговиот дом беше претресен како дел од истрагата за немирите од 6 јануари.
