Шефот на пратеничкиот клуб на демохристијаните во Бундестагот Волкер Каудер рече денеска дека е отворена можноста за вооружување на Курдската работничка партија (ПКК) во рамки на напорите да се победат џихадистите од Исламска држава.
Германија веќе испраќа вооружување на Курдите на северот на Ирак, но германската канцеларка Ангела Меркел претходно ја исклучуваше можноста за вооружување на ПКК, кој со децении се бори за автономија на Курдите во Турција и кој во ЕУ и САД се наоѓа на листата на терористички организации.
Турција, која дава отпор на притисоците да се придружи кон меѓународната коалиција во борбата против џихадистите во Ирак и Сирија, се противи на таков чекор.
– Знам за проблемот што Турција го има со ПКК, но да се седи и да се набљудува како ИД презема важни погранични градови и како нивната закана прераснува во глобална, не може да биде решение, истакна Каудер, кого многумина го сметаат за „десна рака на Меркел“.