Турското Министерство за надворешни работи соопшти дека два турски цивилни брода – „Јашар“ и „Надежда“ – биле нападнати со беспилотни летала во Црното Море, при што се повредени повеќе членови на екипажот, меѓу кои и турски државјани.
Според соопштението, бродовите биле цел на напад непосредно откако синоќа го напуштиле руското пристаниште Новоросијск.
Турските власти наведуваат дека безбедноста на нивните граѓани е приоритет и дека внимателно ја следат состојбата на повредените морнари.
Министерството изрази длабока загриженост поради ескалацијата на конфликтот меѓу Русија и Украина во Црното Море, оценувајќи дека борбените дејствија сè повеќе го загрозуваат цивилниот поморски сообраќај.
Анкара ги повика сите страни итно да преземат конкретни мерки за гарантирање на безбедноста на пловидбата во Црното Море, предупредувајќи дека во спротивно би можело да биде загрозено и глобалното снабдување со храна.