Австралиските власти денеска побараа да се евакуираат северозападните делови на земјата, кои се богати со суровини, поради силниот циклон кој се приближува од отвореното море.
Поројни дождови го зафатија северниот дел на Западна Австралија, а тропскиот циклон Расти премина во бура од трета категорија и се приближува кон брегот. Едно лице загинало во големите поплави во североисточниот дел на Австралија. Втор систем на низок притисок се формира во Индискиот Океан.
Главните австралиски пристаништа за извоз на руда се затворени поради приближувањето на Расти кон брегот, а властите наредија евакуација на овој слабо населен регион кој често е погоден од циклони во летните месеци.
Метеоролозите соопштија дека само „окото“ на Расти изнесува над 30 километри во ширина. Се очекува циклонот од четврта категорија да го погоди северниот дел на Порт Хедленд, околу 1.300 километри северно од Перт.
Се наведува дека утре се очекуваат силни ветрови со брзина од 195 километри на час пред пристигнувањето на Расти, како и дождови кои најверојатно ќе предизвикаат огромни поплави.
Со приближувањето на циклонот до брегот ќе дојде и до формирање на високи бранови кои ќе бидат над нормалната височина и можат да причинат штети на крајбрежните инсталации и објекти.