Северна Кореја денеска соопшти дека никогаш не и доставила на Русија оружје и муниција и нема такви планови, предупредувајќи ги САД да „молчат“ и да престанат да шират гласини кои имаат за цел „да го нарушат имиџот“ на земјата.
Заменик-портпаролот на американскиот Стејт департмент Ведант Пател изјави претходно овој месец дека Русија „е во процес на набавка на милиони ракети и артилериски гранати од Северна Кореја за употреба во Украина“.
Портпаролот за национална безбедност на Белата куќа Џон Кирби подоцна објасни дека станува збор за „потенцијално купување“ и дека „нема индикации дека купувањето е завршено“.
Вашингтон, исто така, го обвини Иран дека и доставува беспилотни летала на Русија за употреба во војната во Украина, што Техеран го негираше.
Русија, исто така, ги отфрли обвинувањата и побара од САД да обезбедат докази.