Германската Социјалдемократска партија остро ги критикуваше американските планови за испорака на оружје за Киев во борбата со проруските сили, оценувајќи дека таков чекор би придонел само за ескалација на судирот.
– Испораката на американско оружје за Украина би била опасен чекор кој брзо би можел да поттикне понатамошна ескалација, изјави Нилс Анен, портпарол на пратеничката група на СДП во Бундестагот.
Изјавата беше дадена по медиумски извештаи дека САД веќе не исклучува можност за испорака на свое оружје за владата во Киев во борбата со проруските сили на исток во Украина.
Германската Влада денеска не се изјасни за тоа прашање. Дали тоа ќе биде тема на дневен ред за време на посетата на Меркел на САД останува отворено прашање, наведува Шпигел.
– Германија нема да доставува оружје за Украина. Ние сме за дипломатско решавање на конфликтот меѓу Киев и сепаратистите, изјави денеска во Будимпешта германскиот канцелар Ангела Меркел.
Во судирите на исток во Украина од април лани загинаа повеќе од 5.000 луѓе, додека 900 илјади се раселени. И покрај примирјето склучено во септември и период на релативен мир, борбите се интензивирани во изминатите неколку недели.