Дводневниот самит на десетте држави на АСЕАН, што започнува денеска во новиот административен центар Наи Пи Тав во близина на главниот град Јангун, ќе го следат 447 известувачи од кои 336 се странски новинари. Собирот на шефовите на држави и влади од регионот на југоисточна Азија ќе го обезбедуваат 11.000 локални полицајци и експерти за безбедност на Интерпол од Канада, Јужна Кореја и Словенија.
На агендата на 24 средба на највисоко ниво на АСЕН се повеќе прашања од областа на економската и културната соработка, меѓу кои е и договор за последните подготовки за формирање на економска заедница на членките на АСЕАН, слична на Европската Унија. Се планира економската унија во рамките на АСЕАН да профункционира кон крајот на 2015 година.
Набљудувачите и аналитичарите очекуваат дека на самитот ќе доминаира спорот на повеќето држави од АСЕАН со Кина, во врска со спорниот суверенитет на водите на Јужно Кинеско Море. Тензиите пораснаа во последниве две недели,поради инциденти меѓу кинески воени бродови со воени и рибарски бродовиод Филипините и Виетнам.