Рускиот претседател Владимир Путин се сретна со унгарскиот министер за надворешни работи Петер Сијарто во Кремљ, со кого разговараше, меѓу другото, за соработката во енергетскиот сектор и изјави дека Москва останува сигурен снабдувач на енергија.
Путин на почетокот на состанокот изјави дека односите меѓу Русија и Унгарија се стабилни и се развиваат позитивно.
„Севкупно, односите се стабилни и се развиваат позитивно, мислам на прашања од енергетската политика, вклучувајќи ги јаглеводородите, и нашиот водечки проект – нуклеарната централа Пакш“, рече Путин.
Тој, исто така, изјави дека Москва е свесна за напорите на унгарскиот министер за надворешни работи да ја одржи динамиката во односите меѓу Русија и Унгарија, „без оглед на познатите тешкотии“.
Рускиот претседател нагласи дека Москва останува сигурен снабдувач на енергија.
Тој рече дека Унгарија не може а да не биде загрижена за состојбата на глобалните и европските пазари на гас и дека Русија е подготвена да разговара за ова прашање.