Трамп, Путин и Си испратија заедничка порака до судот што бара апсење на рускиот претседател

Од:

Американскиот претседател Доналд Трамп, кинескиот претседател Си Џинпинг и рускиот претседател Владимир Путин објавија заедничка изјава по денешната средба во кинескиот Шенжен. Меѓу четирите точки во документот особено внимание привлекува делот посветен на Меѓународниот кривичен суд (МКС), кој во 2023 година издаде налог за апсење на Путин поради сомневања за воени злосторства во Украина.

Тројцата лидери ја нагласиле важноста на почитувањето на имунитетот на државните функционери и порачале дека меѓународните судови не смеат да ги злоупотребуваат своите надлежности.

Оваа формулација има особено политичко значење за Москва, бидејќи Меѓународниот кривичен суд во март 2023 година издаде налог за апсење на Путин поради сомневања за незаконско депортирање и преместување украински деца од окупираните територии во Русија.

Русија не ја признава надлежноста на судот, а ниту САД ниту Кина се негови членки. Заедничката изјава, сепак, не го поништува налогот за апсење и не ги менува обврските на државите што се членки на МКС.

Најавија и реформа на Обединетите нации

Во документот тројцата претседатели се обврзале да поддржат реформа на Обединетите нации со цел организацијата поефикасно да одговори на меѓународните кризи.

САД, Русија и Кина се постојани членки на Советот за безбедност на ОН и располагаат со право на вето.

Според заедничката изјава, реформите треба да овозможат поефикасно исполнување на основната задача на организацијата – зачувување на меѓународниот мир и безбедност. Конкретни предлози за промена на структурата на ОН, сепак, не беа објавени.

Планираат поголема соработка во енергетиката

Една од точките во договорените заклучоци се однесува и на енергетиката. Трите земји најавиле планови за зголемување на производството и снабдувањето со рафинирани нафтени производи, нагласувајќи ја потребата од стабилна испорака на енергенси.

Оваа најава доаѓа во период кога меѓународните санкции ја ограничуваат трговијата со руска нафта и нафтени производи. Во заедничката изјава, сепак, не се наведува дека САД или други држави се согласиле да ги укинат постојните санкции кон Русија.

Нуклеарното оружје исто така на агендата

Трамп, Путин и Си потврдиле дека во нуклеарна војна не може да има победник и дека таков конфликт никогаш не смее да се води.

Трите сили најавиле продолжување на дијалогот за намалување на нуклеарните ризици и спречување на ширењето на нуклеарното оружје. Засега, сепак, не е постигнат конкретен договор за намалување на бројот на нуклеарни боеви глави ниту се утврдени рокови за таков процес.

Заедничката изјава испраќа важна политичка порака за односите меѓу трите големи сили, особено во услови на војната во Украина, меѓународните санкции и зголемените геополитички тензии.

Би можело да ве интересира

Поранешен британски министер: Самитот потврди дека Америка повеќе не е предводник на слободниот свет

Путин првпат се огласи по нападите врз Кримскиот мост: „Нашиот одговор ќе биде многу поболен“

Зеленски: Трамп и Си можат да го принудат Путин да ја заврши војната

Путин: Украина и Европа сè уште не се подготвени за компромис

Си: Нуклеарното оружје е меч што виси над човештвото

Трамп, Путин и Си објавија заедничка изјава, се договорија за четири точки

Горан Наумовски